طريقة عمل قرع العسل الحلو " بالصور "

الأربعاء يوليو 23, 2014 5:32 pm

بسم الله الرحمن الرحيم

جايبالكم النهارده صينية القرع العسل الحلو بالباشاميل

انا باشتري القرع اللي لونه برتقالي غامق بيبقى احلى
و باسيبه بره في المطبخ كام يوم علشان يطرى و اعرف اقطعه
و احياناً بالاقيه جاهز مقطع في اطباق و ده طبعا احسن و اريح

نقطع القرع مكعبات و نحطه في حلة على نار هادئة و شوية سكر عليه
ونسيبه ينزل ميته على أقل من راحته ...بس ما نسيبوش يتهري لازم يبقى
شوية مقرقش علشان ما يبقاش عجينة في الصينية ....وبعد ما يخلص و نطفي
نحطله شوية فانيليا...ما بنحطهاش في الأول لان طعمها بيبقى مُرّ

بعد كده نحطه في مصفى يتصفى كويس

ناخد اللي نزل من المصفى و نزودعليه حليب سائل أو شوية لبن بودرة و نعمل بيه الباشاميل الحلو
بالطريقة العادية سمن و دقيق و نحط عليهم الخليط اللبن و المية بتاعة القرع و بنحط فانيليا في الآخر
ماشي لحد كده ؟؟؟؟

بجهز الصينية اللي هنعمل فيها و ندهنها شوية سمن و نحط شوية باشاميل

بعد كده نحط نص كمية القرع

ونحط مكسرات عليهم

ونكمل بقية القرع و نحط بقية الباشاميل على الوش

ونرش شوية سمن او زبدة و تدخل فرن تستوي

ولما تحمر من تحت و فوق نطفي و نسيبها تبرد وندخلها الثلاجه شوية
وبألف هنا و شفا