أكلات صيفية خفيفة وسريعة ☺

خلصت الامتحانات، وبدأت المصايف، وطبعا في المصيف بنكون عايزين ناكل أكلات سريعة ومانقفش في المطبخ كتير، أو نكون محضّرين الأكل من قبلها، علشان كده في عددنا النهارده هنقدّم لك وصفات لأكلات صيفية سريعة وفي نفس الوقت مغذية ولذيذة؛ تابعونا..





شاورما فراخ أو لحمة
المقادير:

• 3/ 4 كيلو صدور فراخ أو لحمة فيليه
  
• 2 فصوص حبّهان مفروم
  
• ملعقة صغيرة بهارات
  
• فصين ثوم مفروم
  
• 1/ 4 كوب خل
  
• عصير ليمونة
  
• كوب زبادي
  
• ملح وفلفل
  

لعمل الصوص:

• كوب طحينة
  
• فصين ثوم مفروم
  
• 1/ 4 كوب عصير ليمون
  
• 2 ملعقة كبيرة زبادي
  

الطريقة:
1- اخلطي كل المكونات (الزبادي- الخل- الثوم- ليمون- بهارات- ملح وفلفل- حبهان) ولو حسيتي إنها جافة شوية ممكن تحطّي عليها ملعقة زيت.

2- قطّعي الفراخ أو اللحمة شرايح رفيعة، وحطّيهم على التتبيلة، وقلّبيها كويس، وسيبيها في التتبيلة في الثلاجة لمدة 8 ساعات أو ممكن تسيبيها طول الليل.

3- بعد كده طلّعيها من التلاجة، وشوّحيها في حلة صغيرة أو طاسة كبيرة لمدة 45 دقيقة أو لحد ما تستوي.

4- لو حسّيتي إنها نشفت شوية أثناء التسوية ممكن تحطّي شوية ميه صغيرين، بس خلّي بالك إنها ماتستويش أوي علشان الصوص اللي فيها ما ينشفش.

5- في الوقت ده حضّري الصوص اللي هتقدّميه مع الشاورما، وكل اللي عليكي إنك تخلطي كل مكونات الصوص مع بعض، وتقلبيهم كويس وقدّميه مع الشاورما.. وبالهنا والشفا.
 





فاهيتا الفراخ أو اللحمة

المقادير:

• 1/ 2 كيلو صدور فراخ أو فيليه لحمة
  
• ملعقة صغيرة بابريكا
  
• 3 ملاعق كبيرة زيت
  
• ثمرة فلفل أخضر
  
• ثمرة فلفل أحمر
  
• بصلة متوسطة
  
• ملعقة كمون
  
• 2 ملعقة خل
  
• ملح وفلفل
  
• ليمونة
  

الطريقة:
1- قطّعي الفلفل والبصل والفراخ شرايح رفيعة بنفس المقاس تقريبا، وبعدين حطّي عليهم الكمون والبابريكا.

2- حطّي عليهم عصير نصف ليمونة والزيت والخل، وتبّليهم بالملح والفلفل وقلّبيهم كويس، وسيبيها شوية في التتبيلة لمدة 5 دقائق.

3- حطّي شوية زيت في جريل أو طاسة كبيرة وسخّنيها جامد وبعدين شوّحي فيها الفراخ بالخضراوات لمدة من 6 : 8 دقائق أو لحد ما الفراخ تستوي.

4- بعد ما تشوّحي الفاهيتا، رشي عليها عصير نصف ليمونة، وقدّميها بالهنا والشفا.
 





مارجريتا فراخ

المقادير:

• 3/ 4 كيلو صدور فراخ
  
• 1/ 3 كوب عصير ليمون
  
• 1/ 4 كوب زيت زيتون
  
• 2 ملعقة كبيرة كزبرة مفرومة
  
• فصين ثوم مفروم
  
• ملعقة صغيرة شطة
  
• ملح وفلفل
  
• بشر ليمونة
  

الطريقة:
1- اخلطي كل مكونات التتبيلة وقلبيها وبعدين حطي فيهم الفراخ، وحطيها في الفراخ لمدة ساعة أو سيبيها طول الليل.

2- ادهني الجريل أو الطاسة بزيت وسخّنيها على نار متوسطة، وشوحي الفراخ لمدة 4 : 5 دقائق على كل جانب، وقدّميها.. بالهنا والشفا.



حواوشي مصري

المقادير:

• خبز شامي أو بلدي
  
• 1/ 2 كيلو لحمة مفرومة
  
• ملعقة صغيرة حبهان مطحون
  
• كوب مكعبات طماطم
  
• ملعقة صغيرة بهارات
  
•  ملعقة صغيرة قرفة
  
• حزمة كزبرة
  
• ثمرة بصل
  
• ملح وفلفل
  
• ورق لاورا
  

الطريقة:
1- اخلطي كل المكونات مع بعض، وبعدين خدي من خليط اللحمة ده وحطي داخل كل رغيف.

2- غلفي العيش بورق الفويل ورصيه في الفرن وسيبيه لمدة 1/ 2 ساعة واختبريه قبل ما تطلعيه.

3- لو عايزاه مقرمش ممكن تفكي الفويل وتحطيه في الفرن شوية تاني، وقدّميه.. بالهنا والشفا.

وجبات رئيسية

أول حاجة هنبدأ بيها هي الوجبات الرئيسية، يعني هاقدم لكم تنويعات من أطباق اللحوم بأنواعها، يعني لحمة وسمك وفراخ والمكرونات اللذيذة بأشكالها اللي يارب تعجبكم. 


الأسماك


المعروف إن السمك من أسهل اللحوم في الهضم يعني مابيسببش إجهاد للجسم..
ده بالإضافة إلى إن تحضير وجبة السمك سريعة لو قارناها بوجبات الفراخ واللحمة مثلا.

صينية بفتيك السمك

المقادير:
1. خلطة السمك:
• 1 كيلو سمك فيليه "أي نوع".
• 2/1 رأس ثوم.
• بهارات سمك "من عند العطار وبتختلف عن بهارات اللحمة".
• دقيق.
• زيت.

2. باقي المقادير:
• 1 بصلة مقطعة إلى قطع صغيرة.
• خضار مقطع إلى قطع صغيرة (بطاطس – جزر – فلفل رومي)
• كريمة لباني مخفوقة.
• جبن شيدر مبشورة.

3. الطريقة:
يتبل السمك في الثوم وبهارات السمك ويترك السمك 4/1 ساعة ثم يغمس في الدقيق ويشوح في قليل جدا من الزيت. 
يشوح البصل ويضاف إليه الخضار ويقلب إلى أن ينضج ثم يوضع في صينية مع السمك، ويرش بالكريمة اللباني المخفوقة، ويرش بالجبن الشيدر، ويترك في الفرن إلى أن يسيح الجبن فقط. 

بون فام
المقادير:

1. السمك:
• 1 كيلو سمك وقار أو فيليه.
• 2/1 كيلو جمبري كبير.

2. صلصة التتبيل:
• 2 – 3 حزم كرفس (لتتبيل السمك فقط، يعني ما تجيش جنب الجمبري). 
• 2 – 3 حزم بقدونس (للسمك فقط).
• ثوم (الكمية حسب الرغبة لو بتحبي الثوم يبان في الأكل حطي كتير والعكس).
• ملح – فلفل - كمون.
• عصير 2 ليمونة كبيرة. 

3. البشاميل:
• 2 ملعقة سمن.
• 2 ملعقة دقيق.
• 3 كوب لبن.

4. التزيين:
• وردات بطاطس بيوريه، ودي تسلقيها وتهرسيها بالشوكة لغاية لما تبقى زي الكريمة، وتحطيها في القرطاس اللي بيزوقوا به الكريم شانتيه. 

5. الطريقة:
يضرب الكرفس والبقدونس والثوم والملح والفلفل والكمون والليمون في الكبة ويتبل بها السمك. 
يضرب الثوم والملح والفلفل والكمون والليمون في الكبة ويتبل بها الجمبري. 
يشوح الجمبري على النار مع الزبدة. 
يضاف إليه ماء. يترك على النار إلى أن يشرب الماء. 
يقطع السمك قطعا في حجم الكف ويوضع في داخل كل قطعة بعض من الجمبري وتلف كل قطعة. 
يرص السمك في بايركس ويسكب عليه بشاميل خفيف. 
يجمل الوجه بوردات البطاطس البوريه. يدخل الفرن ويسوى في الفرن ومعه الشواية.


المكرونات

طبعا معظم الناس في مصر بتحب المكرونة لأنها سريعة جدا، ده بالإضافة إن فيه ساعات المكرونة وجنبها طبق سلطة بيكونوا وجبة متكاملة. 

طيب إيه الفرق؟ الفرق إننا هنقدم لكم أنواع مكرونات جديدة ومختلفة تفتح النفس. 

يارب تعجبكم.

المكرونة بالفلفل والزيتون
المقادير:

1.المكرونة:
• كيس مكرونة أقلام (أو أي شكل) وتتسلق. 

2.صلصة التتبيل:
• 4 ثمرات فلفل أخضر مقطع إلى قطع صغيرة.
• 1 ثمرة فلفل أخضر شطة مقطعة إلى قطع صغيرة.
• 150 جرام زيتون أسود وتنزع النواه ويقطع حلقات.
• 150 جرام زيتون أخضر وتنزع النواه ويقطع حلقات.
2 ملعقة كبيرة دقيق.
• 2 ملعقة كبيرة صلصة طماطم. 
• 2 ملعقة صغيرة ثوم مفروم ناعم.
• ماء. 
• ملح – فلفل - زعتر – بردقوش "عند العطار ويوضع حسب الرغبة".
• جبن موتزاريلا أو شيدر مبشور أو حتى جبنة رومي جديدة.

3.الطريقة:
تسلق المكرونة وتنشل من ماء السلق. 
يرفع الثوم على النار مع الزيت. 
يقلب المقدار حتى يصفر الثوم.
تضاف الصلصة والماء والتوابل مع التقليب. 
يضاف الفلفل الأخضر والشطة والزيتون الأخضر والأسود. 
يرفع الخليط من على النار. 
توضع المكرونة في طبق بايركس ويقلب فيها خليط الفلفل ثم يضاف الجبن المبشور إلى الخليط ويقلب بخفة. 
يدخل الخليط الفرن إلى أن يسيح الجبن. 
تقدم ساخنة.

مكرونة البستاشوتا
المقادير:

1.المكرونة:
• 2/1 كيلو مكرونة.

2.الصوص:
• 2/1 كيلو لحم مفروم.
• 1 ملعقة كبيرة سمن.
• 1 بصلة تبشر ناعما.
• 4 فصوص ثوم تفرم ناعما.
• ملح – فلفل – زعتر.
• 3 ثمرات طماطم تقشر وتقطع قطعا صغيرة.
• 1 ملعقة كبيرة صلصة طماطم.

3.الطريقة:
• الصوص
يحمر البصل في السمن. ثم يضاف الثوم وبعدين اللحمة المفرومة ويقلب إلى أن تحمر اللحمة.
وبعدين نحط الطماطم والصلصة والتوابل. 

• المكرونة
تسلق في ماء مغلي به ملح.
تخلط المكرونة مع الصوص في طبق التقديم.


اللحوم والفراخ

دول معظم الناس زهقانة منهم (يارب اوعدنا) وهنقدمهم لكم بطريقة مختلفة شوية عن الطرق العادية.

صدور الفراخ على الطريقة المكسيكي 
المقادير:
• 5 صدور دجاج. 
• 3 فصوص ثوم تفرم ناعما.
• 5 بصلات متقطعة حلقات.
• 3 ثمرات فلفل أخضر رومي متقطعة قطع صغيرة. 
• 4 ثمرات طماطم تقشر وتفرم وتزال بذورها.
• 1 كوب عصير طماطم. 
• 2/1 كوب زيتون مقطع.
• 2 مكعب ماجي.
• 1 علبة مشروم أو 2/1 ك مشروم مسلوق ومقطع.
• 2 كوب ماء.
• 1 ملعقة صغيرة زعتر مطحون - 1 ملعقة صغيرة كسبرة مطحونة.
• 1 ملعقة صغيرة فلفل أسود - 1 ملعقة صغيرة شطة - 1 ملعقة كبيرة ملح.
• 5 ملاعق كبيرة جبن مبشور.
• 2 ملعقة كبيرة بقدونس مفروم ناعما.
• 1 ملعقة كبيرة كاري – 1 ملعقة كبيرة زبدة.

الطريقة:

1. صلصة التتبيل:
• يحمر البصل في الزبدة حتى يصفر ويضاف الثوم والفلفل الرومي والطماطم والمشروم، ويترك 10 دقايق. ثم يضاف إلى الخليط عصير الطماطم ومكعبات ماجي المذابة في الماء والزيتون والكسبرة والشطة والزعتر والملح والكاري. 

• الفراخ:
• تتبل صدور الفراخ بـ2/1 كمية الملح والفلفل والشطة والكسبرة والثوم والزعتر ويترك 10 ساعات في الثلاجة، يعني تتبليه من اليوم اللي قبله. تشوى على الفحم أو تقلى في الزيت حسب الرغبة. تضاف قطع الفراخ إلى صلصة التتبيل وتترك لتتشرب الصلصة لمدة 10 ق. قبل النضج يضاف البقدونس ويترك حتى النضج. يصب الخليط في الطبق. يغطى بالجبن المبشور ويدخل في فرن ساخن لمدة 3 ق حتى يسيح الجبن.

يخني اللحم بالحمص 

المقادير:
• 1 كيلو لحم ضأن أو بتلو مقطع مكعبات.
• 2 ملعقة كبيرة سمن.
• 2/1 كيلو بصل قارومة (البصل صغير الحجم).
• 1 بصلة متوسطة مفرية غليظا. 
• 1 كوب حمص شامي مسلوق.
• 10 ثمرات زيتون أخضر مخلل تخلى من البذور وتقطع مكعبات صغيرة.
• 2 كوب عصير طماطم.
• 2 ملعقة كبيرة كاتشاب أو صلصة طماطم.
• ملح – فلفل.

الطريقة:
شوح البصل القارومة في السمن في إناء عميق من جميع الجهات حتى يصير لونه ذهبيا. ينشل البصل ويوضع على ورق المطبخ. في نفس الإناء، يضاف البصل المفري ويشوح على نار هادئة حتى تذبل. تضاف مكعبات اللحم. يقلب المقدار حتى يحمر اللحم من جميع الجهات. يضاف عصير الطماطم ويتبل المقدار ويغطى ويترك على نار هادئة مع التقليب من آن لآخر. وإذا احتاج الخليط يضاف ماء أوشوربة حتى ينضج اللحم إلا قليلا. يضاف الحمص والبصل القارومة والكاتشاب ويترك على نار هادئة حتى تمام النضج. ثم يضاف الزيتون.



خضروات جانبية
مفيش في الصيف أحلى من شوربة الخضار والتورلي، ده بالإضافة للملوخية طبعا والخضروات، ده بالإضافة إنها مابتحتويش على سعرات عالية إلا إنهم كمان ليهم فوايد كتير لدرجة إن اليابانيين بيشربوا الملوخية في فناجين زيها زي الشاي تمام. 


عدل سابقا من قبل ساروكو في الجمعة يونيو 21, 2013 12:36 pm عدل 1 مرات